SIKUR TA KISHA DJALLIN MIK
Sikur ta kisha djallin mik
Nuk do ta kaloja natën
Lakuriq në borë
Pa ngrënë e pa pirë
Nuk do të bartja gurë
Tërë jetën mbi shpinë
Për t’i shpier në majën e kodrës
Do të jetoja i rrethuar
Me shumë miq e mikesha
Që do të më lavdëronin
Edhe kur nuk kam të drejtë
Sikur ta kisha djallin mik
Do të jetoja si mbret
Në kështjellen buzë detit
Duke më shërbyer njëqind robëresha
KAM FRIKË
Nuk guxoj
Të dal për gjah
Kam frikë
Në vend të ujkut
E vras veten
Kam frikë
Kur të kthehem
Në shtëpi
Më pret ujku
Kam frikë
Kur të vdes
Ujku më nxjerr nga varri
NUK KAM KOHË
Nuk kam kohë
Ta vras qyqen
Që ditë e natë këndon
Mbi çatinë e shtëpisë
Nuk kam kohë
T’i prej ferrat e drizat
Që kanë mbuluar
Varrin e babait
Nuk kam kohë
Ta mbys dhelprën
Që nëpër dhomë
Tërë kohën më përqafon
Nuk kam kohë
T’i dua njerëzit
Që m’i vrasin ëndrrat
Nuk kam kohë
Ti shëroj plagët
Që ia shkaktova vetes
KJO STINË
Kjo stinë
Nuk është e përshtatshme
Për ta mbjell
Arën me misër
As për të vjelur
Pemët në kopsht
As për të kënduar
Këngë me çifteli
Kjo stinë
Është e përshtatshme
Për ta vrarë ujkun
Që sorollatet
Rreth shtëpisë
Dhe tërë kohën
Ulërin me zë të tmerrshëm
FOTOGRAFIA JOTE
bashkë me kornizën
po ndryshket
edhe fytyra jote
në murin e nxirë
flokët të janë thinjur
nga pritja që nuk përfundon
qeshja të ësht ngrirë
dhëmbët të janë prishur
sytë të janë errësuar
nga lotët që nuk ndalën
prej ditës kur ike
fjalët sorollatën
nëpër hapësirën e ftohtë
bashkë me erën
sa herë të shikoj
kujtimet si mjegulla
më mbështjellin
shpesh zbret ngadalë
me dorën e gjymtë
retë i dëbon
DITËN QË TË VRAVA
Ditën që të vrava
Prisja të binte shi
Po shi nuk ra
Tri gota
I piva me helm
Që ma mbushi dikush
Tërë natën
Hënën e mundova
Ta kapi me dorë
Në mëngjes
Dielli qau
Mbi varrin tënd
Më nuk mund
Ta gjej rrugën
Që më shpie në kopsht
Në udhëkryq
Prisja dimrin
Të më merrte me vete
Ditën që të vrava
Më mirë
Ta kisha vrarë edhe veten
Sa më vie inat
Që ti je e gjallë
E unë i vdekur
SHITJE
erdhi koha
secili të shesë
nga një organ të vet
dikush sytë
dikush veshët
dikush veshkët
dikush mushkëritë
dikush zemrën
dikush dashurinë
dikush lumturinë
dikush nënën
dikush babain
dikush gruan
dikush vetveten
dikush i shet lirë
dikush i shet shtrenjtë
dikush i shet me kamatë
URREJTJE
i urrej njerëzit
që qeshin
kur duhet të qajnë
i urrej njerëzit
që flasin
kur duhet të heshtin
i urrej njerëzit
që gëzohen
kur duhet të pikëllohen
i urrej njerëzit
që jetojnë
kur duhet të vdesin
