Përktheu Dr Bledar Kurti
Mbi fletoret e shkollës
Mbi tavolinën time e mbi pemë
Mbi rërë të thatë e mbi dëborë
Unë shkruaj emrin tënd
Mbi çdo faqje libri të lexuar
Mbi të gjitha kanavacat bosh
Mbi gurë, gjak, letër a hi
Unë shkruaj emrin tënd
Mbi përfytyrimet e arta
Mbi armët në duart e ushtarëve
Mbi kurorat e mbretërve
Unë shkruaj emrin tënd
Mbi xhungël e shkretëtirë
Mbi fole e driza
Mbi kujtimet e fëmijërisë
Unë shkruaj emrin tënd
Mbi mrekullinë e netëve
Mbi bardhësinë e ditëve
Mbi stinët e dasmave
Unë shkruaj emrin tënd
Mbi teshat e kaltërta
Mbi moçalet e shndritshme prej diellit
Mbi liqenin e gjallë të hënuar
Unë shkruaj emrin tënd
Mbi fusha e horizont
Mbi pendët e zogjve
Mbi mullinjtë e hijeve
Unë shkruaj emrin tënd
Mbi retë e pambukta
Mbi furinë e stuhisë
Mbi shiun e zhurmshëm e të heshtur
Unë shkruaj emrin tënd
Mbi figurinat vezulluese
Mbi tingujt e ngjyrave
Mbi të vërtetën e natyrës
Unë shkruaj emrin tënd
Mbi shtigjet e larta
Mbi rrugët e gjera
Mbi sheshet që gumëzhojnë prej turmave
Unë shkruaj emrin tënd
Mbi llambën që po lëshon dritë
Mbi llambën e fikur qëkur
Mbi mendimet e mia të përbashkuara
Unë shkruaj emrin tënd
Mbi frutin e ndarë më dysh
Mbi pasqyrën dhe strehëzën time
Mbi shtratin tim porsi një guaskë të zbrazët
Unë shkruaj emrin tënd
Mbi qenin tim trazovar e të përkëdhelur
Mbi veshët e tij të ngritur përpjetë
Mbi putrat e tij të mprehtë
Unë shkruaj emrin tënd
Mbi pragun e derës sime
Mbi orenditë plot nostalgji
Mbi flakët e zjarrit bubulak
Unë shkruaj emrin tënd
Mbi butësinë e lëkurës
Mbi vetullat e miqve të mi
Mbi çdo dorë që më shtrihet
Unë shkruaj emrin tënd
Mbi habinë e surprizave
Mbi buzët që presin puthje
Mbi asgjënë më shurdhe se heshtja
Unë shkruaj emrin tënd
Mbi rrënojat e strehimores sime
Mbi fenerët e mi të rënë përdhe
Mbi terrin e mërzisë sime
Unë shkruaj emrin tënd
Mbi mallin pasion-shuar
Mbi vetminë lakuriqe
Mbi marshimet e vdekjes
Unë shkruaj emrin tënd
Mbi përtëritjen e jetës
Mbi rrezikun e kaluar
Mbi shpresën pa të shkuar
Unë shkruaj emrin tënd
Përmes fuqisë së një fjale
Unë vij në jetë përsëri
Sepse kam lindur për të të njohur ty
Për të shqiptuar e nderuar emrin që të takon
LIRI
