More
    KreuLetërsiBibliotekë"N’fushëbetejë shtratin kam me e kthy" cikël poetik nga Donika Dabishevci

    “N’fushëbetejë shtratin kam me e kthy” cikël poetik nga Donika Dabishevci

    KRYQZUEME PARA TIJ

    Jam krejt e brishtë
    kur ftyrë e tij m’zen ninëzat.

    T’dridhmet trupit
    ma zi se t’rrqethunat dimnave t’acartë.
    Krejt n’gjamë, plotë frymë,
    humbun n’valë jam,
    nji shej, nji rreze, nji dritë tuj pritë.
    Fort u qindron tundimeve t’mia
    ai i mbshtjelluni me diell n’flokë.
    Prej syve, mollzash, poshtë buzve tan’ musht
    kryqzueme e zbrapsun para shenjtnisë s’tij.
    S’jepet ai…
    Luftar mitik që s’njeh dorëzimin. 
    Dashnia n’mu veç vjen e rritet –
    se e du fort e i falem veç t’pajepshmes!


    N’ATË T’PËRVEÇMEN DITË

    Nji ditë n’përveçmëninë e saj
    papritueshëm kam me ta dhanë kumtin
    se erdh koha me t’i shkye shtatë lëkurat
    si rrangalla t’vjetra me t’i thye,
    e me t’i gjujtë edhe lëvozhgat e shpirtit
    tuj gërmue me e gjetë palcën
    e naj vishkull drite n’sy.
    Nadje heret masi t’jen’ mpi gjymtyrtë
    kam me t’pa zbuluet tan’ paqtim.
    Qielli ka me dënesë prej gëzimit,
    shiu ka me gjallue edhe rrasat e vorreve,
    n’zogj t’hareshëm ka me i kthye
    e sytë e gjelbër kanë me lulzue.
    Nji ditë n’përveçmëninë e saj!


    EDENI JEM!

    Je porti, je bregu
    degë e artë je
    që thrret shtegtar’
    molepsun udhësh
    n’aromë pishash
    lugnajave tua
    me zbritë me u ndalë
    me i kthjellë sytë
    n’at’ fresk mëngjesi
    me ju dorëzue
    përkdheljeve n’gushë
    magjepsun andrrash
    n’atë lojë hyjniesh
    krejt etjen e tyne
    me e përmbushë
    si gurrë me shpërthy lumnija
    eliksirit tand tuj ju falë
    n’kopshtin tand t’Edenit
    n’strehën e amshimit
    mos me pasë gjarpën
    as dreq që m’ndalë


    VULLKAN

    N’fushëbetejë shtratin kam me e kthy
    n’llavë ke me u zhba e kam me t’përbi
    si kulçedër zjerm kam me lshu
    ti ke me kanë njeri veç mrena n’mu
    e jasht s’ke me mbetë gja
    as ti as qenja jote

    ti ke me kanë unë
    e unë kam me shndritë veç me ty mrena


    ME TY

    Kan’ me kërcitë
    tanë damart prej mllefi,
    ka me u përskuqë lëkura
    ftyra me u përflakë qefi
    dashninë kem me e ba luftë
    e luftën dashni!

    SHKRUAJ NJË PËRGJIGJE

    Ju lutem lini komentin tuaj!
    Ju lutemi shënoni emrin tuaj këtu

    Artikujt më të fundit

    KATEGORITË