1.QIEJ MERMERI
Qiej mermeri
pa peshë,
Dallëndyshe kundër rrymës
pa mbërritje.
Pleq ripërtypës kujtimesh
pa tym,
Aerobi pemësh bri rrugëve
pa erë.
E bardha bëhet e kaltër,
E zeza mbetet pa bojë,
Zaret janë hedhur,
Jeta është lojë.
Pikat e shiut, lotë virgjëreshe,
Prishen në shtratin e lumit,
Avullojnë të mistershme,
Si britma pa dënesë.
E bardha ngjyhet me të kuqe,
E zeza ndërron bojë,
Në kurthin e ditës,
Jeta është lojë.
2. FILLIKAT
Si derë e mbyllur me mur,
S’më vjen trokitja qyshkur.
Si muzg violet mbi dritare,
Më thyhet zemra gastare.
Si pemë skelete pa gjeth,
Më sillet era për rreth.
Si pyll i rrafshuar me zjarr,
S’më mbin fidani në zhar.
Si tokë ku s’del një kalli,
Pa lulëkuqe stoli.
Si qiell i mbetur pa blu,
Pa bisht komete bizhu.
Si hon i gremisur pa urë,
Pa një ylber si dikur.
Si derë, si muzg përmbi pyll,
Si tokë, qiell pa yll.
Si hon i shkretuar pa fat,
Ashtu krejt bosh fillikat.
3. MAJË GISHTASH
Majë gishtash djali me ritmin e të zgjaturit,
Ashtu vajza nën puthjen e të dashurit.
Majë gishtash burri kthyer vonë pas gotës,
Ashtu gruaja tek gjumi i foshnjës.
Majë gishtash mjeku mbi shtrat të pacientit,
Ashtu vartësi tek zyra e shefit.
Majë gishtash vjelësi i mollës nga toka,
Ashtu ne tek distanca nga Evropa.
4. PIKA EKUILIBËR
Lëkundet koha e humbur,
Tek rendja në pista stresi,
Me rrotat vrik të parasë,
Ku në retinën e syrit,
Përmbyset prizmi i botës.
Sa bie nata e thellë,
Fanitet rrezja e yllit
Dhe nis zbulimi i vetes,
Te pika ekuilibër,
Për t’u ribërë Njeri.
5. IMAZH
Kalimtar tokës,
Pasagjer qiellit,
Krehër mes flokësh
Rrezet e diellit.
Gjestet dhe fjalët
Për dashuri,
Gdhendin në ajër
Art harmoni.
Si kalimtar
A pasagjer,
Jam një imazh
Dridhës në erë.
6. MUZG NË SHËN NAUM
Një kishë nën qiell,
asgjë s’ka më shumë,
Një varkë liqenit
dhe shenjti Naum,
Një degë blerimi
e kaltër mbi lumë,
Një diell në ikje
përhënur gjithkund.
Ca tinguj këmbanash
po luten mbi ujëra,
Mes qindra qirinjsh
me flakë të pashuara,
A janë murgesha
nën kryq të përkulura,
A nimfa legjendash
të lashta, të zhdukura?
Një hap s’bëj më tej,
kudo ka magji,
Nga këmbët tek flokët
bulon dashuri,
Se shelgjet me rrënjë
në Drinin e Zi,
E ndezin flakë muzgun
si një mrekulli.
7. MUZIKË NË LËVIZJE
Çiftet përqafuar në shkallaret e shesheve,
Si akrepat e orës në çast të tingëllimit,
Nëse një ditë ndahen, nëse një natë s’shihen?
Bëhen fotografë të verbër në qytet,
S’mbështeten asnjëherë mbi shkopin e urrejtjes,
Armiq të mirë mbesin.
Muzikë në lëvizje është puthja pa u fshehur.
8. SHKALLËT
Ngjitëse, zbritëse njëherësh,
Shkallë granili, mermeri,
Palosëse, rrotulluese,
Lëvizëse, fikse, druri,
Metali, mëndafshi, litari –
Aventureske mes erës.
Rrëshqitëse akull janë
Veç shkallët e karrierës.
